分別

 

 

我成日都想打blog. 因為依家愈黎愈多人知我呢個blog
但係無相我又廢事打.. 齋睇文字真係好悶好悶好悶
因為我自己睇人地blog都係見到字多少圖我就係咁飛!!
如果你唔係同我好熟, 我諗你都唔會續隻續隻字睇啦..

都係個句啦. 其實有呢個blog既原意
係俾我親戚們同埋入唔到我xanga既人睇
其他朋友唔係自己發現都應該唔會知道呢個blog既存在
(當然有幾位好朋友係知道啦)
因為呢度打既野同xanga既大致相同
只係近日我鍾意係呢度打多左抒情既野
而係xanga好多時都係得記敘下日常生活

個人好矛盾.. 好想講d野俾人知但又唔想俾某d人見到
「咁你以後唔俾個d人睇到你打既野咪得囉!」
咁又唔得wor, 有時我又想俾個d人睇到我既內心感受
所以話呢.. 我份人就係永遠都衰心軟

好似好耐無講下自己依家係nyc既感覺..
其實我已經開始慢慢習慣架喇
始終都黎左有半年既時間有好多野唔想習慣都要習慣
同埋如果你唔開心咁過d時間真係過得超級無極的慢............
依家我又唔係唔開心又唔係開心, 但我覺得d時間突然之間過得好快!
尤其係跳左舞之後.. 講真我真係會去期待星期五, 可以去跳舞
一來可以做下運動, 二來可以離開兩位老人家
遲d會去做埋community services..

我對兩位老人家既感覺比以前已經好左好多
依家我開始識得將聽到既野過濾..我鍾意聽就聽; 唔鐘意聽就唔聽!
有時聽佢地講既野真係會令到自己好辛苦
我又執著呢, 佢地講野講得離譜我真係有個衝動想話佢地!
成日都去岐視某種人, 但可能人地都係咁樣睇你囉..
算喇, 佢地既野我唔會多講

我個人好情緒化, 開心個陣就雞啄唔斷唔開心個陣就自閉
係rosedale我多數都係自閉多.. 始終有電腦我多數都呢埋係間房度
係間屋講得最多野應該係同媽/朋友傾電話既時候
如果唔係我可以一日入面講得十句野..
但係表哥度我就多數雞啄唔斷笑個不停.. 相隔十九年都會代溝
究竟係我老丫定你後生呀!?!?!?!?

問我有無掛住香港?? 我緊係有架..
但係掛住既感覺好似無之前咁強烈..
最掛住香港既時候就係行街買野個陣/唔開心既時候
行街買野見到就話:香港都有啦/香港仲平啦, 洗乜係度買呀
唔開心個陣就好想有朋友係我身邊同我傾下計
不過唔緊要啦.. 仲有三個幾月我就反黎喇, 
到時傾到我無哂口水都完全無問題呀!!

好喇.. 我要講既野講哂喇~~ 新相就無喇, post舊相啦

話說2006年4月, 謝氏家族多左個小生命...

令我呢個超級鐘意bb既人母愛泛濫哈哈哈..
(其實無咁誇張!! 只係多左機會有bb玩....)

 

又話說2007年11月.. 有人話我做咩突然多左個細細佬/多左個仔
後者真係好荒謬! 邊個講既自己對號入座!!!

 

唔知梁氏家族幾時會有新生命既誕生呢??