莫拉菲下的好好玩!!

 

 

2009-07-18 (Saturday)

 

打風. 又打風!! 連續兩個星期六都掛三號波呢
不過對我黎講都無咩野. 打風街都可以照出架啦!

今晚我地就出去睇戲. 睇十點
睇之前我地去左沙田既風記避風塘食飯
食到尾聲先發覺係佢鴻星的旗下

佢d 魚湯既野都好好味!
平日出街好怕飲個d 湯底/汁因為驚多味精
但今次呢d 又唔係wor..都幾鮮味, 食完唔口渴架wor

梁家希不肯出鏡
因為佢話佢新haircut 太短好核突
咁我真係唔知咩野叫長喇~~

姑丈其實同我地一齊個陣真係好開心
佢呢種釋放壓力的方法真係要好好向佢學習!

我生日個晚可能都會係呢度食
因為要柴娃娃好噪既話一定唔可以食fine dinner
加上在座太多大食積喇.. 食呢d 小炒就最好不過啦哈哈

我地去又一城睇harry potter
有少少好悔睇左本書先睇戲其實
因為我知道哂內容同埋知套戲cut 左幾多野..
本書真係七集入面最好睇.. 但套戲真係遜色喇

睇完收到風八號波呀!! 好彩我地趕到尾班火車咋
返到黎我地再轉的士返屋企. 其實我地可以行既
不過真係勁大風同埋行返去段路好多樹
年年打大風條路都有好多樹壯烈犧牲..所以講真真係OK 危險

不過的士司機係我地都未上車就講:「額外加十蚊有無問題?」
有問題都要搭架真係  最後原本$14.5 變到$24.5
都未試過係果度搭咁貴的士返屋企呀!!

落車傘都反.. 三個決定唔開傘衝返入去..我覺得個刻好好玩哈哈!
因為d 風大到可以吹郁我地.. 又少少水浸
我一路跑一路笑一路叫成個傻婆咁

結果我地濕哂! 等lift 個陣我仲叫個姨姨幫我地影相哈哈

我真係成個癲婆咁既樣.. 細佬跑得快濕得最少哈哈

 

 

2009-07-15 同姑姐返左大陸幫表姐拎野
跟住我地好即興咁去左整指甲.. 其實我第一次整咋
好平呀! 同埋手工真係唔差! 全部手畫唔係貼貼紙架..
個d人手畫lace 真係好勁.. 我返去之前會整多次!!!